భారత రైల్వే రారాజు 'రాజధాని ఎక్స్‌ప్రెస్'.. దీని ప్రత్యేకత ఏంటంటే?

భారతీయ రైల్వేల చరిత్రలో రాజధాని ఎక్స్‌ప్రెస్‌కు ఓ ప్రత్యేక స్థానం ఉంది. వేగం, సౌకర్యం, ప్రాధాన్యత, చారిత్రక ప్రాముఖ్యతకు ప్రతీకగా నిలుస్తూ 'రైల్వేల రారాజు'గా ఇది గుర్తింపు పొందింది. దశాబ్దాలు గడిచినా, ఎన్నో కొత్త రైళ్లు వచ్చినా దీని ఆదరణ మాత్రం తగ్గలేదు.

1969 మార్చి 3న న్యూఢిల్లీ నుంచి హౌరా (కోల్‌కతా) మధ్య మొట్టమొదటి రాజధాని ఎక్స్‌ప్రెస్ ప్రారంభమైంది. అప్పట్లో ఇది ప్రయాణ సమయాన్ని దాదాపు 17 గంటలకు తగ్గించి సంచలనం సృష్టించింది. భారతదేశంలో తొలి పూర్తి ఎయిర్ కండిషన్డ్ (ఏసీ) ప్రీమియం రైళ్లలో ఒకటిగా నిలిచిన రాజధాని, ప్రయాణికులకు అందించే సేవలు, శుభ్రత విషయంలో కొత్త ప్రమాణాలను నెలకొల్పింది.

ఈ రైళ్లు దేశ రాజధాని న్యూఢిల్లీని ముంబై, చెన్నై, బెంగళూరు, గువహటి వంటి ప్రధాన నగరాలు, రాష్ట్ర రాజధానులతో కలుపుతాయి. తమ మార్గాల్లో వీటికి అత్యధిక ప్రాధాన్యత లభిస్తుంది. దీనివల్ల ప్రయాణ సమయాల్లో జాప్యం దాదాపుగా ఉండదు. ఎంపిక చేసిన మార్గాల్లో గంటకు 130 నుంచి 140 కిలోమీటర్ల వేగంతో ప్రయాణిస్తాయి. టికెట్ ధరలోనే భోజనం వంటి సౌకర్యాలు కల్పించడం దీని ప్రత్యేకత.

ప్రస్తుతం వందే భారత్, శతాబ్ది, తేజస్ వంటి ఆధునిక ప్రీమియం రైళ్లు అందుబాటులోకి వచ్చినప్పటికీ, రాజధాని ఎక్స్‌ప్రెస్‌కు ఉన్న వారసత్వం, స్థిరమైన ప్రమాణాల కారణంగా దానికి ఇప్పటికీ ప్రత్యేక స్థానం ఉంది. సుదూర రైలు ప్రయాణాన్ని ఆధునికీకరించడంలో రాజధాని పోషించిన పాత్ర ఎంతో కీలకమైనది.